يا جماعة.. نرجوكم شاركوا معانا في حملة (حماية)...

يا جماعة.. نرجوكم شاركوا معانا في حملة (حماية)..

تعالوا نواجه المخدرات.. تعالوا نواجه ونساعد عشرة مليون شابّ مدمن في العالم العربي..
نساعدهم يقللوا، ويوقفوا الإدمان، أو حتى نقلل العدد..
تعالوا نحمي الأصحاء علشان يفضلوا أصحاء..

وأنا عارف إن فيه ناس كتير، وأنا عمال أقول: الحملة.. وعايزين نعلق مليون استيكر.. وعايزين نعمل خمسة آلاف نشاط.. وعايزين نوجّه خمسة آلاف مدمن علشان يبدأوا برنامج العلاج.. أنا عارف إن فيه ناس كتيرة وهي بتسمعني بتقول: يا عم، هو ده هيغير حاجة؟! والله يا جماعة هاقول لكم حاجة، وده هدف الكلمة دية: أحياناً تغيير وجه إنسان يكون سبب في تغيير العالم كله.. أحياناً وجه إنسان يتصلح، فيكون تصليح الإنسان ده تصليح لمئات من حوله، بل يمكن للآلاف من حوله..

أنا عارف إن الكلمة دية عايزة مَثَل، وأنا هاضرب لك مثل عجيب، هي حكمة صينية بتقول إن: (كان في أب قاعد، وماسك الجريدة، وعمّال بيقرأ في الجريدة، كان بيتفرج على وجه الكرة الأرضية، وهي محطوطة على الجريدة، وهو عمال يشوف فين مكان مصر وفين مكان الهند، وعمّال يدرس الخريطة قوي على ورقة كاملة، وابنه عمّال يشدّ فيه: يا بابا يا بابا يا بابا، من كتر زهق الأب من الابن، وهو عمال يزنّ عليه، وهو مش عارف يركز في الخريطة راح ماسك الجريدة قطّعها، وراح راميها، وبعد ما رماها افتكر إن هو عايز يبص في الجريدة، فقال للولد: عقابًا لك رجّعها زي ما كانت، وطبعًا عشان يرجع جريدة عليها الكرة الأرضية ده حيفضل فيها أسبوعين، وكمان مش حيعرف، فالولد راح خمس دقائق، ورجع قاله: خد جريدة بدل المتقطعة).

فالحكمة الصينية بتقول: إن الأب بَص وجد الكرة الأرضية متظبطة، قاله: إنت عملتها إزاي، قاله: أصلاً أنا يا بابا لقيت إن وجه الصفحة الأخرى كان فيها وجه إنسان، فلما إنت قطعت قلت بدل ما أصلح الكرة الأرضية أعدل وش الإنسان، لقتها سهلة قوي، عينين، وأذنين، وفم، وأنف، فلما عدلت وجه الإنسان قلبت الصفحة لقيت الكرة الأرضية اتصلحت.

الحكمة عايزة تقول لك: إنك متستهونش بتصليح إنسان..
والقرآن علمنا كده: {وَمَنْ أَحْيَاهَا فَكَأَنَّمَا أَحْيَا النَّاسَ جَمِيعًا}..

علشان ممكن تصليح إنسان يصلح ملايين من وراه، ويصلح أصحابه، فيصلحوا أصحابهم، وهكذا..

يا جماعة شاركوا معانا في حملة (حماية)..
صلح وجه مدمن..
عدل حياته..
احفظ إنسان كان رايح للإدمان..
واحفظ وجه الكريم الموصول بربنا؛ علشان يعيش حياة نقية..

حملة (حماية) بترجوكم تشاركوا معانا فيها..

أشكركم، والسلام عليكم ورحمة الله وبركاته

نايس توبيك يا قمر