ادخل واقره واضحك

كنت قاعد من كام يوم باتفرج على فيلم رد قلبى والراحل حسين رياض قاعد على الكرسى المتحرك
وفجاءة تجمد المشهد بتاع الفيلم
وتخيلت نفسى مخرج لوذعى من اياهم من مخرجين افلام الروائع .. حريم كريم وماشابه.. وبدءت اتخيل الفيلم بالصورة اللى تناسب الوقت اللى احنا عايشين فيه
مع الاحتفاظ بالابطال بتوع الفيلم وقلت اغير مريم فخر الدين بهيفاء وهبى علشان بس النيولوك بتاع القصة وخصوصا اسم هيفاء واوا.. قصدى وهبى.. حايشجع الناس على الانجاب.. قصدى على قراية القصة
موش حاطول خلينا نعيد صياغة الجزء الاخير ولو عجبكم نكتب الفيلم كله مع الاعتذار طبعا لثورة 23يوليو
حسين رياض عم عبد الواحد الجانينى اللى كان شغال فى عزبة يوسف والى باشا وفى يوم من الايام عم عبد الواحد تجرء على سيده البيه وطلب سلكة توصيل يعنى بس لو الباشا يوسف والى يسمح لعم عبد الواحد ياخد توصيلة سلك من artعلشان بس الاولاد فى البيت يتفرجوا على ماتشات كاس العالم زى بقية خلق ربنا
طبعا الباشا هاج وماخ وثار وتوعد وشخط فيه وقالوه ..عبد الواحد انت اكيد اتجننت وبتخرف بقى عايزنى انا اسمحلك توصل سلكة من الدش بتاعى لحد بيتك علشان تشوف كاس العالم ياأخى عنك ماشوفت ولاتشوف
ونده بصوت عالى.... يا هيثم ..ياتامر..(دول البودى جارد اللى بقوا مكان البواب والطباخ فى الفيلم كانوا عثمان وخليل) ..تعالوا خدوا الراجل اللى بيخرف ده
حسين رياض صعبت عليه نفسه رجع البيت مهموم حزين
كانت فردوس محمد مستنيه متمكيجة(يعنى راجعة من عند الاسطى الكوافير وحطة مكياج)وكمان دلقة على روحها ازازة برفان بحالها
وواقفة تغنيله... ليك الواوا... بوس الواوا... خلى الواوا... تصح بص لها حسين رياض بأسى وقلها كان زمان ياشابة ماعدش ينفع روحى غيرى هدومك المسخرة دى ...واتحشمى انا جوزك ..موش غريب
واغسلى وشك وهاتى لى صحن الفول علشان اتغدى
رديت عليه فردوس محمد وقالت له سلامتك ياراجل فول ايه ده انا عاملة لك بفتيك ولحمة مشوية وفراخ محمرة
رد عليها حسين رياض وقلها انتى ياولية ماشفتيش المفتى لما افتى بعدم جواز الجمع بين اللحمة والفراخ على طبلية واحدة شرعا
وجاتنا منين الفراخ واللحمة ده احنا فى سنة 2006موش 1952لطفك يارب.. لطفك يارب.. وواقع ماحطش منطق
مسكين مااقدرش يستحمل يرجع البيت يلاقى مراته مستنياه فى ابهى صورة مفروض تكون عليها الست وهى بتستقبل جوزها
مااقدرش يصدق انه ممكن اى انسان يرجع البيت ويلاقى مراته عاملة اكل...والاكل حايجى منين الا لو توفرت حكومة تؤمن بأن من مسؤليتها توفير حياة كريمة لكل مواطن
ماعلينا... عمنا حسين رياض اتشل فيها
وفى يوم من ايام الصيف الطرية
وعمنا حسين رياض قاعد فى الفرانده على الكرسى ابوعجل
وفى ايده كوز درة
وهوب دخلت عليه انجى بنت الباشا واللى بتقوم بدورها هيفاء وهبى
بص لها حسين رياض وبص لكوز الدرة اللى فى ايده ومااقدرش يتكلم ماهو اخرس انتوا نسيتوا والا ايه
بس قلها مئ مئ...يعنى تاخدى حتة؟
هزت دماغها على طريقة روبى وهى قاعدة عالبسكيلتة ..بيدارى كده ..ولادارى بده..ونزلت دمعة على خدودها وراحت قاعدة جنب حسين رياض وحطت راسها على رجله
طبطب عليها حسين رياض
وفجاءة ..رفعت راسها ..وبصت لحسين رياض وقالت له..رجب حوش صاحبك عنى ...رجب صاحبك جننى
قوم حسين رياض رد عليه وقلها أمئ أمئ .. أمئ أمئ ..يعنى ياستى انا موش رجب
هيفاء وهبى واضح انها مابتفهمش فى لغة الخرس بصيت له وقالت له ..ماتقاطعنيش وكملت رجب انا بنت شقية رجب صاحبك موش ليا
رد حسين رياض..أمئ أمئ .. أمئ أمئ ..يعنى يقطعك ويقطع رجب ...ياستى انا اسمى هنا عبد الواحد ولو موش عاجبك اندهينى بعم جادالله..زى ماشادية وصباح كانوا بيندهونى
كان واضح ان هيفاء موش فاهمة أمئ أمئ .. أمئ أمئ
وبينما عم عبد الواحد غرقان مع هيفاء واوا.... فى حوار من طرف واحد
اذا بالباب ينفتح على مصرعيه ويدخل صلاح ذو الفقار مع شكرى سرحان
ويتهلل وجه صلاح ذو الفقار بالبشر ويهلل صائحا ..ويكا ياويكا
يرد حسين رياض..أمئ أمئ .. أمئ أمئ.. يعنى انا موش ويكا
صلاح ذو الفقار يستغرب ويقول ماله ده؟
ترد هيفاء وتقوله مسكين عنده واوا.. اخرس يعنى
عنها وينط صلاح ذوالفقار زى يونس شلبى فى مدرسة المشاغبين
ويصقف ويقول ...ابويا اتخرس.. ها..ابويا اتخرس.. ها..
شكرى سرحان يغير مجرى الحديث ويفتح شنطة اللاب توب ويطلع البلاى استيشن بتاعته ويديها لابوها اللى بيرد عليه ويقوله....أمئ أمئ .. أمئ أمئ..يعنى شكرا ياعلى انا معايا كوز الذرة
وبينما هم على هذه الحالة اذا بمظاهرة فى الشارع صاخبة
وكان اليوم 23يوليو
والمظاهرة بتصرخ بالنداء التقليدى لأى مظاهرة
الكباب الكباب لنخلى عيشتكوا هباب...الكباب الكباب لنخلى عيشتكوا هباب
حسين رياض بدء يترعش
وحاول يقف...
صلاح ذو الفقار حاول يساعد ابوه علشان يقف
لكن عم عبد الواحد زقه
وسحب البنت اللى زى لهفة القشطة هيفاء واوا ....واتسند عليها
وبدء يشاور بكوز الدرة اللى فى ايده ويقول... كاس العالم ياكلاب ...لنخلى عيشتكوا هباب
وكل 23يوليو.. وانتم طيبين
هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههه
مع تحياتى
مصطفى